年宵「禮義廉」大字T恤贈興!民建聯譚耀宗賊喊捉賊話教壞人@蘋果2010.2.10
民建聯維園年宵檔噚日開張，一班身穿印有民建聯黨徽同「禮義廉」三隻大字 T恤嘅人去捧場，八方相信佢哋都係想睇吓剪綵嘉賓財爺鬍鬚曾風采，同埋為民建聯贈興，點知唔行近猶自可，一行埋啲幾乎好似去到中聯辦咁，事關民建聯攤位外竟然放晒鐵馬，仲有多個維園保安、警察戒備，民建聯聲言開門建黨，擺年宵卻拒人千里。
鬍鬚曾駕臨，有年宵檔主希望佢照顧吓小市民，大嗌「財爺放水」，點知話口未完，八方就 見到多個戴住耳機嘅便衣警員現身，驚死有人對鬍鬚曾不利咁怒睥嗌「放水」者，嚇到大家即時收聲。做完賀年騷後，警員組成人鏈護送鬍鬚曾離場，民建聯創黨主席兼立法會主席曾鈺成亦急急腳走人，話趕去西環幫街坊寫揮春。有記者問佢日前係咪幫街坊寫咗張「五區公 投」揮春，佢表情意外地反問：「你哋點解會知 o架？」
事緣有人喺網上 post咗張「五區公投」揮春，聲稱係曾主席墨寶；民建聯反對公投，常理唔會寫撐公投 揮春，點知曾鈺成直認張揮春出自佢手，至於點解肯寫，佢詳細解釋。「五係五福臨門，區 係區泰民安，公係公平合理，投係投資有道，哈哈哈哈。」
北京、建制派、高官聞五區公投色變，曾主席權威解釋五區公投，證明合情合理合法合憲， 其他人不應說三道四，既然曾主席都撐五區公投，煲呔唔使顧忌，一於去投票啦。
八方知道好多人最想民建聯寫「禮義廉」揮春，阿曾話街坊開口，佢唔會托手踭，「唔緊要啦，過年過節，大家都係想開心啫，市民都係想開心啫。」不過民建聯主席譚耀宗卻無咁易話為，表明「我唔寫揮春嘅！」遑論寫「禮義廉」揮春，直指有人「教壞後生仔」，「成日講埋呢啲嘢係無意思嘅，成日喺度侮辱人係無意思嘅，我哋係有教育水平嘅人嚟嘅！」呢樣 好多人都知，民建聯孝悌忠信禮義廉吖嘛！
pf_lee@appledaily.com
(李八方)
