出 bra 陳克勤（左）出席《城市論壇》，觀眾席黑衣青年突然起身，拎出一個 bra。
移走主持謝志峰將個 bra移去自己面前，上面清楚寫住「搓胸」兩個大字。
80歲後 vs 90後
你鬥大聲 80歲後的維園阿伯，搶大聲公叫囂。
我扮鬼臉
90後青年一個鬼臉，令維園阿伯哭笑不得。
[蘋果日報]民建聯新星陳克勤曾經因為一句「搓 my breast」而揚名 YouTube，估唔到事隔年幾，呢個陰影仍然揮之不去。噚日陳克勤出席港台《城市論壇》討論 80後現象，突然有位現場觀眾衝上台前，向佢飛 bra抗議。克勤住枱面個 bra（胸圍），似笑非笑，不知如何是好，主持人謝志峰人急智生，即刻出手拎走個 bra，幫克勤「解圍」。
噚日維園嘅《城市論壇》非常熱鬧，講到 80後現象，有紅衫觀眾發言，話要解決領導人口中嘅「深層次矛盾」，最直接就係還政於民，叮囑克勤要「 try your best」爭取 2012雙普選。現場立即報以熱烈掌聲。
飛 bra男係論壇常客
此時突然有個應該係 80後嘅黑衫青年從觀眾席殺出，衝上台前，向克勤飛擲出一個寫住「搓胸」嘅肉色胸圍。克勤嘅反應拍得住曾經被掟鞋嘅布殊咁敏捷，只見佢舉起雙手擋面，個 bra最後落喺佢面前張枱度。台下多名維園阿伯紛紛起身，圍住飛 bra男痛罵，場面混亂。謝志峰急急拉個 bra去自己枱頭，宣佈中止現場直播，話「民情哄動，暫停一陣先。」飛 bra男返埋位又拎起一盒生豬肉，但未發動攻勢已被個西裝友請離場。
《城市論壇》主持人兼監製謝志峰向陳克勤表示歉意，佢話印象中今次係第一次有台下觀眾衝上台掟嘢，但佢認得飛 bra男係論壇嘅常客，但以前未試過咁做。佢批評飛 bra男今次行為非常討厭，但冇蓄意傷害陳克勤嘅意圖，所以最後請咗佢走，冇報警。
飛 bra男離場後，點知輪到 80歲後阿伯跟 90後互相「挑逗」。台下有位十幾歲嘅 o靚仔對住激動嘅維園阿伯舉手疾呼，「我哋要流血到最後！我哋要搞革命打倒共產黨！」維園阿伯紮紮跳，用大聲公喪鬧 o靚仔， o靚仔伸脷扮鬼臉回敬，其他阿伯群起攻之，保安員要拉走 o靚仔平息風波。
「便衣」同事睇場控制
《城市論壇》真係乜人都有，謝志峰話雖然有時啲觀眾情緒激動咗啲，但係想盡量保持開放討論嘅氣氛，場面亦未至於失控，暫時都唔會喺台前加圍欄，亦唔想要觀眾入場前登記留名。唔講唔知，原來現場除咗着制服嘅保安，仲有幾個「便衣」同事睇場。佢話呢啲同事係紀律部隊前成員，控制混亂場面駕輕就熟，而請飛 bra男離場嘅西裝友，好可能就係「便衣」。
