毓民炳鄭家富唔開會又執口水尾 @ TVB NEWS 2009-01-07
明報 B16 | Emily女記者日記 2009-01-08
社民連主席黃毓民火爆係人都知，除咗批評建制派外，每遇到唔滿意嘅事，即使係民主派自 己友，都一樣會鬧大交。噚日喺立法會工務小組會議，毓民就同民主黨鄭家富「炒大鑊」， 炒到要休會5 分鐘先肯停口。
不滿阿富「無開會執口水尾」
話說工務小組討論旺角大球場改善工程問題，其實上個月民政事務委員會已傾過一次，委員 都畀咗唔少意見，包括毓民提出喺球場加設上蓋嘅問題，當時政府方面已經解釋有一定難處 ，委員亦無強求一定要加設上蓋先收貨。
而噚日會上，再有人提出加設上蓋嘅問題，鄭家富更要求工程要拎返去事務委員會再傾，先可以將項目交去財委會表決。毓民聽到呢度就火都嚟埋，立即反駁阿富，指呢個意見佢一早已經提出咗，但阿富唔去開民政事務委員會，而家就話要返轉頭傾，真係玩嘢咩！阿富強調 自己唔係玩，只係畀意見，仲話立法會好嚴肅。
毓民就好嬲咁罵阿富唔去開會，但又話要返轉頭，阿富反指「無開會唔可以講嘢咩，唔係大聲就得」，兩個人愈講愈火爆，最後搞到主席何鍾泰要大家冷靜吓，飲啖水，休會5 分鐘先再開會。雖然後來都無再鬧交，但毓民過咗幾個鐘後，仲同記者講，話阿富唔去開會 又執佢口水尾，怒氣仲未消。
